Sistemet e sotme të kontabilitetit nuk kanë kontribuar aq sa duhet në zhvillimin e një mentaliteti financiar në shumë ndërmarrje të vogla dhe të mesme, pasi e përqendrojnë vëmendjen kryesisht mbi dinamikat ekonomike dhe pasurore.

Në këtë skenar lind dhe zhvillohet metodologjia e propozuar në monografinë Pasqyra e flukseve të likuiditetit që, nëpërmjet analizës së flukseve financiare, synon të japë një skemë interpretuese të dinamikës financiare të ndërmarrjes, duke kapërcyer mënyrën statike që karakterizon, edhe pse shumë e rëndësishme, analizën e bilancit me anë të marzheve dhe me anë të treguesve. Pasqyra e flukseve financiare nuk paraqitet në këndvësh­tri­min thjeshtë kontabël, por si instrument praktik, një skicë e vërtetë analitike dhe vendimmarrëse, e aftë për të evidentuar në një kënd­vësh­trim të vetëm dinamikën ekonomike, financiare dhe pasurore të ndërmarrjes, qoftë ajo e studiuar mbi bazë historike, ashtu edhe ajo e realizuar në shprehje perspektive.

Në fakt, metodologjitë e analizës, teknikat e përpunimit dhe aftësia sinjalizuese e konfiguracioneve të ndryshme të pasqyrës së flukseve financiare, të paraqitura në këtë libër, zhvillohen pikërisht rreth nocionit të likuiditetit, meqenëse është likuiditeti që mundëson të pasqyrohet në shprehje monetare cilado qoftë dukuria e ndër­marrjes. Kjo lejon të kapërcehen vështirësi të mundshme interpre­tuese lidhur me metrikën ekonomiko-pasurore të bilanceve të ndërmarrjes dhe të shfrytëzohet një gjuhë më e thjeshtë dhe e drejt­për­drejtë e flukseve të arkës. Kështu, formulimi metodologjik mund të gjejë zbatim si në kuadrin e analizës financiare historike, ashtu edhe në kuadrin e analizës perspektive, në të cilat pasqyra e flukseve financiare ose, më saktë, buxheti financiar, bëhet instrumenti bazë për proceset e planifikimit dhe të programimit.

Analiza financiare; logjika ekonomike dhe logjika financiare; struktura pasurore; dinamika ekonomike; flukset financiare; pasqyra e flukseve financiare; nocioni i likuiditetit; flukset monetare dhe flukset e likuiditetit; parimet kontabile dhe referimet normative; modeli i flukseve të likuiditetit; modeli i pesë fushave etj. janë disa nga problemet kryesore që trajton teksti.