Objektivi kryesor i tekstit Analiza e investimeve. Metoda dhe aplikime është aftësimi teorik dhe praktik i studentëve për kryerjen e analizave mbi leverdishmërinë e projekteve investuese nga ana e ndërmarrjeve dhe individëve. Teksti trajton gjerësisht teorinë, metodologjinë, fazat e analizës, teknikat, instrumentet dhe mënyrën e kontrollit të leverdishmërisë së investimeve. Në të pasqyrohen zhvillimet më të fundit në lidhje me problemet aktuale të analizës së investimeve. Në këtë aspekt, teksti saktëson, madje evoluon, mjaft koncepte lidhur me përkufizimet e investimeve në aspektin kontabël, praktik, matematikor dhe sintetik.

Është synuar që problematika e trajtuar në këtë tekst të jetë e vlefshme për një spektër më të gjerë se auditorët. Kështu, operatorët ekonomiko-financiarë e të gjitha niveleve do të balla­faqohen me metodologji, instrumente dhe teknika mjaft të dobishme në punën e tyre, pasi për financat moderne planifikimi i veprimtarisë investuese konsiderohet si veprimtari me rëndësi parësore të ndërmarrjeve.

Analiza e investimeve, koncepte bazë; bazat e matematikës financiare në funksion të analizës së investimeve; bazat e analizës së investimeve industriale; metoda ekonomike dhe pasurore e vlerësimit; metoda financiare e vlerësimit; vlerësimi ekonomiko-financiar dhe metoda kosto/përfitime; vlerësimi i investimeve nëpërmjet programeve kompjuterike; kapitulli përmbledhës dhe zbatime praktike; fjalor i analizës së investimeve; janë disa nga problemet kryesore që trajton teksti.