Teksti Universitar Sëmundjet e Kafshëve Ripërtypëse, është botim i ripunuar që afrohet në dispozicion të studentëve të Fakultetit të Mjekësisë Veterinare dhe mjekëve veterinerë që punojnë në prodhim.
Teksti është përgatitur në bazë të programit të ri të lëndës Sëmundjet e Kafshëve Ripërtypëse, që zhvillohet në Fakultet. Ai përmbledh dymbëdhjetë kapituj në të cilët përshkruhen sëmundjet e brendshme, sëmundjet infektive, ato parazitare, helmimet që vërehen më shpesh në kafshët ripërtypëse, ndërhyrjet kirurgjikale që aplikohen në praktikë dhe patologjitë e kafshëve të sapolindura. Në tekst patologjitë trajtohen sipas sistemeve dhe në bazën e çdo sëmundjeje janë vendosur elementët përbërës, si shkakësia, patogjeneza, klinika, ndryshimet morfologjike, zhvillimi dhe prognoza, diagnoza dhe diagnoza diferenciale, mjekimi dhe masat parandaluese.
Në hartimin e këtij teksti janë shfrytëzuar të dhënat më të reja bashkëkohore të literaturës për patologjitë e këtyre specieve si dhe përvoja shumë vjeçare e vetë autorëve dhe e specialistëve të prodhimit. Informacioni që jepet në tekst është tërësisht i karakterit kliniko-formues dhe plotësisht i zbatueshëm në kushtet e veprimtarisë klinike në Fakultet dhe prodhim.
Teksti i ripunuar Sëmundjet e Kafshëve Ripërtypësve mbështetet në vlerësimet e botimit të parë dhe reflekton vërejtjet e sugjerimet dashamirëse të përdoruesve të tij. Autorët shprehin mendimin se përgatitja dhe botimi i këtij teksti do të ndikojë në rritjen teoriko-profesionale të studentëve dhe specialistëve të prodhimit dhe njëkohësishtdo të jetë kontribues i drejtpërdrejtë në mbrojtjen e shëndetit, rritjen e prodhimit, aftësive riprodhuese të kafshëve ripërtypëse, etj.