Fati i një libri nuk ngjason me atë të njeriut. Ditëlindja dhe ditëvdekja e këtij të fundit duken të përcaktuara. Ditëlindja e një libri quhet botim i tij, por libri ka kohë që është konceptuar dhe deri në botimin e tij, është një rrugë e gjatë.
Idea për të paraqitur problemet kryesore të sociologjisë rurale dhe asaj urbane ka filluar vite më parë, kur fillova të mbledh material për problematikën që mbulojnë këto disiplina sociologjike. Në sociologjinë rurale materialet ishin të shumta, por shumica më karakter empiric. Ato i referohen një problematike të përcaktuar në hapsirë dhe në kohë. Sa të vlefshme do të ishin për lexuesin shqiptar?. Mandej nuk duhet harruar se bota rurale është në transformim të vazhdueshëm nën ndikimin e shoqërisë urbane. Në këtë mënyrë, studimi i ambientit rural u mpleks me studimin e atij urban.
Problematika për të cilën interesohen këto disiplina sociologjike është mjaft e gjerë për më tepër për to interesohen edhe disiplina të tjera sociologjike. Përcaktimi i kufijve të kësaj problematike, dallimi nga disiplinat e tjera është problem më vete, pasi nuk ka një vijë ndarëse të prerë dhe të përcaktuar njëherë e mirë.